Prima de tuto ringrazsio Dio dei esàr nasù ne la tera de la SERENISIMA. Ringrazsio i mé veci che i a lavorà duro, per farne esàr uncuo, amai, invidiai e "copiai" nel mondo. Mi son nasù a Jesolo, e come se dixeva in quei tenpi: "a l'onbra del campanil de San Marco". Nesuna costruzsion la podeva esàr pì alta del campanil, in tuta la Repùblica Vèneta. Se jera orgolioxi de considerarse 'rassa Piave', esendo Jesolo bagnà da La Piave, ed esèndoghe stat el campanilismo tra i paexi, che l'à jutà l'ingegno de ognun a crésar. L'è co 'sto spirito che ò frequentà a scuola muxaicisti de Spilimbergo, ò lavorà na dexina de ani a Milano col Maestro Pietro Cantù, infine son rivà in BISAZZA, market-leader nel canpo del moxàico.

Me prexente: Lino Sacilotto.
Ò fàt sto breve pasajo, par provar a spiegar i mé decori, fruto de na pasión, quela de imortalar Venexia nei quadri de moxàico, a l'alba, quando tuto l'è silenzsio. I è inizsiai nel 1972, so na cantina a Milàn i primi studi, par un moxàico diverso, che el podése trovar posto a l'interno de le caxe, come quadro, senzsa aver un pexo ecesivo. L'è nata na tècnica nóva: separar le robe fate da l'omo, con mosaico, da quele de la natura. El tuto su un panel de legno. La poxa de le tesere la vien fata diretamente so la cola. El quadro a manca, che l'è del 1978, l'è un exenpio.

Venexia la è na cità unica, la pì visitada e amada. No la à altre cità conpagne, esendo anca la cità de l'amor.

Venexia - Ponte S. Cristoforo e palazso Dario   cm.62 x 121

La me pasion par Venexia la è po svilupà verso le caxe del Vèneto, e a la cultura contadina che la à condizsionà el modo de pensar nel Veneto, e in particolar a le sò abitazsion, che me ricorde un tenpo piene de vita, piene de toxatei, fémene, òmeni e bestie. Ades la masima parte de 'ste caxe, no existe pì, e le poche restàe le è o ristruturae, o conpletamente abandonae in atexa del crolo. L'è un vero pecà, che inmanco na parte de queste no le posa esàr recuperae, come le è state recuperae le Vile Venete.

Na testimonianzsa del nostro recente pasato la è drio sconparir nel menefreghismo general.

Le jera costruzsion piene de vita, e religioxità, e speso soto a la "barchésa", se podeva trovar a rafigurazsion de la Vergine Maria col banbin Gesù.

=>> L'arte del moxaico =>>


Par catarme
e-mail: info@sacilotto.net


<= Home Page  |  L'arte del moxaico =>